ШҮДНИЙ ЭМНЭЛГҮҮДИЙН ХҮҮХДЭД ҮЗҮҮЛЭХ ҮНЭ ТӨЛБӨРГҮЙ ҮЙЛЧИЛГЭЭ ХЭЗЭЭ ЭХЛЭХ НЬ ТОДОРХОЙГҮЙ БАЙНА
Засгийн Газраас баталсан “Эрүүл шүд-Эрүүл хүүхэд” үндэсний хөтөлбөрийн хүрээнд 2-6 насны хүүхэд, зайлшгүй тохиолдолд 7-12 насны хүүхдэд нэг удаа үнэ төлбөргүйгээр үйлчлэх шүдний эмнэлгүүдийг Эрүүл Мэндийн даатгалын ерөнхий газраас сонгон шалгаруулснаа зарласан. Шалгаруулалтад тэнцсэн эмнэлгүүдийн нэрс тодорхой болсон өдрөөс уг үйлчилгээг хэзээ, хэрхэн авахыг асууж сураглах эцэг эхчүүд их байлаа. Тиймээс бид энэ талаар Монголын Шүдний мэргэжилтнүүдийн холбооны Дархан-Уул аймаг дахь салбарын Тэргүүн Ц.Дэмидвандан эмчээс утсаар тодрууллаа.
Тэрбээр хэлэхдээ “Манай эмч нар яамнаас ирсэн журамтай өчигдрөөс л танилцаж байна. Бидэнд ч бас тодорхой ойлголт байхгүй байна. Манай Дарханы 11 эмнэлэг тэнцлээ гэх хариу ирсэн. Гэхдээ эрүүл мэндийн даатгалын талаар, гэрээний талаар, үйлчлэх журам, төлбөрийн талаар тодруулах юм их байна. Тэгж байж гэрээ хийж, үзлэг эмчилгээг хийж эхлэх үү, аль эсвэл түр хойшлуулах уу гэдэг тодорхой болох байх. Эмнэлгийн захирлууд бид уулзаад, ярилцаад л сууж байна. Нэг хүүхдэд 60.000 төгрөг хүртэл үйлчилгээ үзүүлнэ гэсэн бий. Энэ нь яг юуны төлбөр, ямар үйлчилгээ үзүүлэх вэ гэдэг тодорхойгүй байна. Гэрээ хийгдээд эхлэхээр тодорхой болох болов уу. Мөн манай улсад 2-12 насны хүүхдүүдийн дунд, нэг хүүхдэд оногдох шүдний цоорол 5-6 байна гэсэн судалгаа бий. Дундаж тоо нь ийм байхад яамнаас бүрэн эрүүлжүүлнэ гэсэн нь их эргэлзээтэй байгаа юм. Сүүлийн хэдэн өдөр энэ талаар асуусан үйлчлүүлэгчид маш их байлаа. Байнга утсандаа хариу өгөх хэцүү, эмчилгээ үйлчилгээгээ ч гүйцэд явуулж чадахгүй байдалд хүрч байгаа учир эцэг эхчүүдээсээ бүх зүйл тодорхой болтол түр хүлээж байна уу гэж хүсье” гэлээ.
Сэтгэгдэл (2)