ХӨВГҮҮДИЙГ ЗОДОЖ БАЙГААГ БАГШ НЬ МЭДЭЖ БАЙВ
Зураг дээрх хүү 11 настай, 6 дугаар ангийн сурагч. Хичээл тасалж, ангидаа сахилгагүйтсэн учир ангийнх нь хөвгүүдтэй хамт багш нь шийтгэж, шал угаалгажээ. Гэтэл нэг ангид хамт сурдаг Д-ийн аав ирж, яагаад оройтсоныг асуусан байна. Багш хөвгүүд сахилгагүйтсэн хэмээн хэлэхэд “Би эд нарын шороог нь гөвөөтхие” гэжээ. Ангийн багш арын өрөөндөө орж ажлаа үргэлжлүүлэх зуур, аав хөвгүүдийг шүүрний ишээр хэд хэдэн удаа ороолгосон ба цохих явцад шүүрний иш хугарсан талаар хөвгүүд ярьж байна. Энэ болж буй үйл явдлыг багш мэдэж, харж байсан хэдий ч зогсоох гэж оролдоогүй ажээ.
Сүүлийн үед хүүхэд хүчирхийлүүлсэн талаарх сэтгэл сэртхийм аймшигтай үйл явдлууд сонстож, хүүхдийн эсрэг хүчирхийллийг зогсооход Монгол Улс бүх нийтээрээ анхаарал хандуулаад байгаа. Гэвч сургуулийн орчинд ил, далдаар хүүхэд хүчирхийлэлд өртөж, эрх нь зөрчигдсөөр байна. Үүний нэгэн жишээ нь энэ. “Шороог нь гөвөх”, “Хөвгүүдэд даруулга хэрэгтэй” гэх зэргээр хүүхэд хүчирхийлэхийг илтээр дэмжсэн энэ мэт хандлагууд нь бяцхан зүрхэнд айдас хуруулж байна. Тэдэнд цаашид юу тохиолдох, тэдний сэтгэл зүрх хэрхэн эмтэрч, тэд ирээдүйд ямар хүн болоход энэ удаагийн “Шороог нь гөвсөн” үйл явдал хэрхэн нөлөөлөхийг хэлж мэдэхгүй нь. Ямартаа ч өнөөдөр зодуулсан хүү “Дахиж хичээлдээ явахгүй” хэмээн ээждээ хэлж, зодсон аавын хүү “Намайг гэртээ очихоор бас зодно доо” хэмээн нулимстай ярьж байна.
Энэ бүхнийг боловсролын байгууллагын ажилтан, багш хүн болох л үйл явдал мэт ажиггүй хараад өнгөрүүлсэн нь харамсалтай.
Сэтгэгдэл (22)