БАГШ НАР ЗАХИРЛАА ХҮЛЭЭН ЗӨВШӨӨРӨХГҮЙ БАЙНА
Ж.Насанжаргал 2016 оны дөрөвдүгээр сард тус сургуулийн захирлаар томилогджээ.
“Ажлаа хүлээн авсан цагаасаа л сургууль дээрээ тоотой үзэгддэг, хамт олныг манлайлах, үлгэрлэх чадваргүй нь харагдаж, багш нарынхаа урам зоригийг мохоон, сургуулийн амжилтыг ухраан багш нарынхаа бухимдлыг төрүүлж байсан” гэж эх сурвалж ярилаа. Тиймээс ч сургуулийн хамт олон удаа дараа өөрт нь сануулахын зэрэгцээ холбогдох албаныханд мэдэгдэж, улмаар суулт зарлаж байжээ. Тухайн үед асуудлыг үндэслэлтэй эсэхийг хянан үзэхээр Боловсрол соёлын газраас долоон хүний бүрэлдэхүүнтэй сахилгын хороо байгуулан ажилласан бөгөөд Ж.Насанжаргал захирлыг ЕБС-ын захирал, СӨББ-ын эрхлэгч, соёлын байгууллагын дарга нарын сахилгын дүрмийн хэд хэдэн заалтыг зөрчсөн байна гэх дүгнэлтийг гаргаж байв. Гэвч асуудал шийдэгдээгүй бөгөөд удалгүй Ж.Насанжаргал захирал жирэмсний амралтаа аваад одоо Ядамсүрэн захирал түр орлон ажиллаж байгаа юм байна.
Багш нарын ярьж байгаагаар бол Ж.Насанжаргалын тус албан тушаалд томилогдсон нь эргэлзээтэй, ашиг сонирхлын зөрчилтэй байж болзошгүй гэнэ. Учир нь Ж.Насанжаргалыг захирлаар томилогдох үед нөхөр Р.Эрдэнэбаяр нь аймгийн Засаг Даргын орлогчоор ажиллаж байжээ. Улмаар эхнэртээ тохирсон шалгуур үзүүлэлтээр сонгон шалгаруулалтыг зарлан, өрсөлдөгчгүйгээр захирал болгосон гэлээ. Тухайлбал , сургуулийн захирлаар 10-аас доошгүй жил багшилсан, таваас доошгүй жил удирдах албан тушаалд ажилласан хүнийг томилдог. Гэтэл Ж.Насанжаргал нь тухайн үед БСУГ-т ердөө нэг жил арга зүйч хийсэн туршлагатай байжээ. Тиймээс ч багш нар Захиргааны хэргийн шүүхэд гомдол гаргахаар бэлдээд байгаа юм байна.
Багш Ч.Мөнхтуяа:
- Захирал гэдэг тухайн сургуулийн аав /ээж/ нь юм. Өглөө ирэхэд захирал бүх багш нартайгаа мэндлээд зогсож байх хичнээн сайхан байдаг гээч. Ингэж л аав, ээжийн сэтгэлээр ажиллаж байж багш ажилчид нь ажиллах, хичээл сургалт хүмүүжлийн ажлаа явуулах урам зоригтой байж, сургуулийн үйл ажиллагаа тогтвортой байдаг. Бид ийм л захирлыг хүсч байна хэмээн ярилаа.
Бид энэ талаар Ж.Насанжаргал захиралаас тайлбар авах гэсэн боловч тэрбээр дахин холбогдсонгүй.
Сэтгэгдэл (4)