ЭКОЛОГИЙН ЦАГДААГИЙН АЛБА ДАРХАН-УУЛ АЙМАГТ БАЙГУУЛАГДАНА
Монгол Улсын Засгийн газар өнөөдрийн /2020.01.06/ ээлжит хуралдаанаараа Экологийн цагдаагийн нэгж байгуулах шийдвэр гаргалаа.
Тус нэгж нь хүрээлэн буй орчныг хамгаалах, энэ төрлийн гэмт хэрэг, зөрчилтэй тэмцэх, урьдчилан сэргийлэх, байгаль орчин, уул уурхайн олборлолттой холбоотой экологийн аюулгүй байдлыг хангах чиг үүргийг хэрэгжүүлэх юм.
Эхний ээлжинд байгаль экологи сүйдээд байгаа гол 11 аймгийн 100 гаруй сумдад энэхүү алба байгуулагдахаар болж байна. Эдгээр аймгуудын тоонд манай Дархан-Уул аймаг оржээ.
Байгаль экологийн хувьд эрүү, хэв журмын нөхцөл байдал хүндэрсэн, ойн сан бүхий болон хайгуул, ашиглалтын тусгай зөвшөөрөл эзэмшигч аж ахуйн нэгж, нөхөрлөл ихтэй хэмээн Засгийн Газраас тодорхойлсон дээрх 11 аймагт Дархан-Уул, Архангай, Баянхонгор, Булган, Дорнод, Өвөрхангай, Өмнөговь, Төв, Сэлэнгэ, Хөвсгөл, Хэнтий аймгуудад багтаж байна.
Экологийн Цагдаагийн алба байгуулагдсанаар цагдаагийн байгууллагад нийт 170 орон тоог нэмж байгаа бөгөөд шаардагдах зардал 2020 оны төсөвт суусан, бэлтгэл ажил хангагдсан тул Засгийн Газрын тогтоол хүчин төгөлдөр болмогц хэрэгжүүлэх ажил шууд эхэлнэ хэмээн ХЗДХ Сайд Ц.Нямдорж өнөөдөр мэдээллээ.
Сэтгэгдэл (4)