Дарханы залууст Япон улсад ур чадварын дадлагажигчаар ажиллах боломжийг бий болгох хамтын ажиллагааны санамж бичгийг “HIT” төв болон “Шилмэл мөнх трейд” компаниуд өчигдөр үзэглэлээ.

Ингэснээр, хоёр улсын хууль тогтоомжийн дагуу олгогдсон 1100 гаруй квотод Монгол залуус, тэр дундаа Дарханы залуус Япон улсад төрөл бүрийн мэргэжлээр ур чадварын дадлага эзэмшиж, албан ёсны зөвшөөрөлтэйгөөр ажиллах боломж бүрдэж байгаа юм.  

Талууд төслийн зорилго, үр өгөөжийн талаар хэлэхдээ “Залуус технологи хөгжсөн, өндөр хөгжилтэй улс оронд ажиллаж, ур чадвар эзэмшин дадлагажиж ирснээр зөвхөн тэдний өөрсдийнх нь ажил амьдралд эерэг өөрчлөлт бий болоод зогсохгүй, Монгол улсын үйлдвэрлэлийн хөгжилд чухал үүргийг гүйцэтгэнэ” гэв.

Дархан-Уул аймагт үүд хаалгаар шинээр нээгээд байгаа HIT технологийн төвийн гүйцэтгэх захирал О.Тэмүүлэн “Өнөөдөр бид хамтран ажиллах санамж бичгээ үзэглэлээ. Ингэснээр Дарханы иргэд арлын Япон улсад ажиллах нэгэн шинэ гарц нээгдэж, улмаар амьдралын цоо шинэ баталгаа бүрдэж байгаа юм. Бид, залуусаа зөвхөн өндөр хөгжилтэй улс оронд ажиллаж, дадлагажих алхамыг хийгээд зогсохгүй цаашид эзэмшиж ирсэн дадал, ур чадвар, мэргэшил, технологио эх орондоо нэвтрүүлж, улмаар  өөрийн ирээдүйн бизнес, цаашдын ажил амьдралд ашиглах үүд хаалгыг нээж байна. Би залуу хүн. Үеийхээ залууст болон Дарханчууддаа энэ боломжийг олгож байгаадаа тун их баяртай байна. Тун удахгүй HIT төвийн үйл ажиллагаа эхэлж, Дарханчуудынхаа ажил амьдралд олон эерэг өөрчлөлтүүдийг бий болгох ажлуудыг хийнэ”  гэлээ.

Япон улсад ажиллах дадлагажигч нь хуулийн дагуу нийгмийн даатгал, эрүүл мэндийн даатгал, ажилгүйдлийн даатгал, гэнэтийн ослын даатгал зэргийг төлөх бөгөөд дадлагын хөтөлбөрөө амжилттай дуусгаж ирээд нийт төлсөн нийгмийн даатгалын шимтгэлийнхээ 70%ийг буцаан авах боломжтой юм байна. Мөн цаашид тогтсон хугацаатайгаар гэр бүлээрээ ажиллаж амьдрах, улмаар мэргэжлийн болон их дээд сургуулиудад суралцах боломжуудыг HIT төв бүрдүүлэхээр ажиллаж байна.  

Эхний ээлжийн дадлагажигчид хоёрдугаар сарын 15-наас эхлэн явах ба дараах мэргэжлийн чиглэлүүдээр дадлагажих боломжтой. Үүнд:

• Барилга,
• Хөдөө аж ахуй
• Зочид буудал
• Нэхмэл хувцас
• Сувилахуй
• Машин – металл
• Пластик үйлдвэрлэл
• Загас агнуурын салбар
• Авто засвар
• Шаазангийн үйлдвэрлэл
• Гагнуур
• Будаг гэх зэрэг ба эдгээр нь цаашид өөр өөр салбаруудаар нэмэгдэх ажээ.

Одоогоор фермерээр ажиллах 50 захиалга бэлэн ирсэн байгаа бөгөөд Дарханчууддаа  тусгайлан зуучлалын уян хатан нөхцөлийг санал болгож байна.

Дашрамд дурьдахад “Шилмэл мөнх Трэйд” ХХК нь 2018 оноос Япон улсад ур чадварын дадлагажигч илгээх ажлыг НХХЯ-ы албан ёсны зөвшөөрөлтэйгөөр явуулж ирсэн бөгөөд Япон улсын нийгэмлэгүүдтэй хамтран барилга, хөдөө аж ахуй, үйлдвэрийн хог хаягдлыг дахин боловсруулах зэрэг салбаруудад “гинжин хэлхээ” хэлбэрээр хүний нөөцийн бүрдүүлэлтийг хийн ажиллаж ирсэн компани ажээ.

Дэлгэрэнгүй мэдээллийг 85868380, 91000089 дугаарын утсаар лавлаарай.