ДАРХАН-УУЛ АЙМГИЙН МАН-Д ШИНЭЧЛЭЛ ХИЙХ ХЭРЭГТЭЙ
ЭРХЭМ ДАРХАНЧУУДАА, ЭРХЭМ ЖУРМЫН НӨХДӨӨ!
Манай намын удирдлага сахилга хариуцлага, авилгаас ангид, шударга ёсыг тогтоох тухай бодлого гарган намын бүх түвшинд хэвшүүлэн мөрдүүлэхээр ажиллаж байгаа билээ. Энэ чухал цаг үед Дархан хотынхоо иргэдийн итгэлийг бодлого мөрийн хөтөлбөрийн хэрэгжилтээр дааж яваа МАН орон нутгийн төвшинд шинэчлэгдэх зайлшгүй шаардлагатай болжээ. Сүүлийн үед манай намд авилгал, албан тушаалын наймаа, хувийн явцуу эрх ашигаа эрхэмлэх, шудрага бус байдалыг өөгшүүлэх, амин хувиа хичээсэн улс төржилт нь зөвхөн намын дээд түвшинд байгаа бус бүх түвшинд амь бөхтэй оршсоор байгаа нь нууц биш юм. Өөрөөр хэлбэл МАНАН, 60 тэрбумыхан зэрэг схем манай аймагт ч оршин байсаар байна.
Бид залуу хүний хувьд ах захаа дээдлэн, намын уламжлал , эв нэгдлээ эрхэмлэн хүлээцтэй, тэвчээртэй асуудалд хандсан боловч ийм ийм явдал удаан үргэлжилвэл бид ч тэдний нэг мэт ойлгогдох, эв нэгдэл гэх хуурамч халхавчин дор шударга ёс, хууль дүрмийг уландаа гишгэлж , амин хувийн ашиг хонжоо, хувийн улс төрийн явцуу эрх ашгаа эрхэмлэдэг зарим манай намын удирдлага шиг болох ирээдүй биднийг хүлээж байна.
ЗАЛУУЧУУД БИД ИЙМ ЗАМААР ЗАМНАХ ГЭЖ УЛС ТӨРД ОРООГҮЙ, харин шударга ёсыг тогтоож , зүй ёсны шинэчлэлийг эхлүүлж , бодлого мөрийн хөтөлбөрийн дор өчүүхэн хувийн эрх ашгаа нууж ажил, албан тушаалын төлөө улайран явдаг намын зарим удирдлагад хариуцлагад тооцож, өөрчлөж ,шинэчлэх нь намын олон мянган жирийн гишүүдийн өмнө хүлээсэн бидний үүрэг юм аа. Нөгөөтэйгүүр энэ нь төрийн шинэтэглийн ажлыг орон нутагт хэрэгжүүлэх, бэхжүүлэх ажлын үндэс юм.
Өнөө маргаашийн сонгуулийн эрх ашиг, намын эв нэгдэл алдагдана гэж зарим намын гишүүд шүүмжилж байгаа хэдий ч энэ шинэчлэлийг эхлүүлэхгүй юм бол цаашид хэзээ ч шинэчлэл хийх талаар ярих бүү хэл, бодох ч боломжгүй болтлоо Дархан -Уул аймгийн МАН-ын хорооны өнөөгийн удирдлага ялзарч , эрх мэдэлдээ сагаж, намын дотоод ардчилалгүй болж, цөөн хэдхэн олигархижсан удирдлагын гарт бүрэн орж МАНАН-татах боллоо. Ийм хуурамч дүр эсэгсэн эв нэгдэл нь манай намд асар их хор хохиролтой болохыг 2020 оны сонгуулийн дүн харуулах бизээ.
Шинэчлэлгүй намд ирээдүй үгүй болно.
Намын эгэл жирийн гишүүд БИД мөнгөтэй компанийн харамч захирлын ажилчид биш ээ. Төрийн албаны хүнд сурталтай хөнгөн бодолтой , явцуу эрх ашигтай дарга нарын албан хаагчид БИД биш ээ .
Санал шүүмжлэл хэлсэн намын гишүүдээ гадуурхагдаг, хавчдаг хяхдаг, урвагч болгон цоллодог, намын дотоод ардчиллын төлөө дуугарсан болгоны амь амьдралын эрх ашгийг нь хөндөж, ялгаварладаг, хохироодог, дарамталдаг намын удирдлагын дуулгавартай албат нь БИД биш ээ.
Бид үзэл бодол итгэл үнэмшлээрээ нэгдсэн улс төрийн тусгаар тогтнолын хил хязгаарыг сэтгэл зүрх, итгэл үнэмшилээрээ манаж байгаа нийгмийн зүтгэлтнүүд билээ.
Ачааны хүндийг үүрч чадна хэмээн намын журмын олон нөхөд нь итгэн бидэн дундаас итгэл хүлээлгэж хариуцлага үүрүүлсэн намын зарим удирдлага үүнийг эрх мэдэл хэмээн эндүүрэн үнэнч журмын нөхдөө өөрийн боол мэт харж, өөрөөс нь өөр ухаантан байхгүй мэт дур зоргоороо аашлан бидэнтэй зөвлөлгүй дангаар шийдвэр гаргадаг боллоо. “Би” –ээр өвдсөн энэ нөхдийг “БИД” болтол хариуцлага тооцож эмчилье нөхдөө.
Намын буянаар улс төрийн өндөр албан тушаалд хүрсэн зарим зальт үнэг, цөөвөр чононууд та нар намын шинэчлэлийн салхийг сөрөн ,жам ёсны эсрэг түүнийг нухчин дарж амьдралаар нь тогловч, цаг хугацааг хэзээ ч нугачин дарж чадахгүй шинэчлэлийн салхи хэзээ ч зогсохгүй гэдгийг санаж яваарай.
Шударга ёсыг уландаа гишгэсэн ийм адын бололтой адгийн новшнуудын гараар 100 жилийн түүхт НАМ-ынхаа түүхийг Дархандаа булшлуулахгүйн төлөө залуучууд бид итгэлт журмын мянга мянган гишүүдийн хамт сэрэмжлэн тэмцэх болно.
Миний бие Дархан Уул аймгийн МАН ын хорооны дэд даргын хүндтэй бөгөөд хариуцлагатай албыг дөрвөн жил хашиж, хангалттай сайн үнэлгээтэйгээр намын ажлын арвин баялаг туршлагатай журмын нөхөр бөгөөд дүү Т.Тулгадаа хүлээлгэн өглөө.
Өнгөрсөн хугацаанд амаргүй нөхцөлд олон том ажлыг зохион байгуулахад хамтран ажиллаж, чин сэтгэлээсээ хамтарч, дэмжиж ирсэн аймгийн намын хороо, түүний зарим тэргүүлэгчид, аймаг , сумдын ИТХ-ын төлөөлөгчид, Б.Азжаргал, Б.Хадбаатар, Д.Амарсанаа, Н.Ганбаатар даргатай сумдын МАН хороо түүний гишүүд, зовлон жаргалаа хуваалцаж явсан эрхэм дотнын үүрийн дарга, дэд дарга нар, багийн дарга нар, ИНХ-ын дарга нар, мянга мянган намын гишүүд дэмжигчид, ажлын албаны хамт олондоо талархал илэрхийлж байна. 2016 оны МАН-ын өндөр ялалт амжилтын буухиаг 2020 онд үргэлжлүүлнэ гэдэгт итгэж байна. Намын шинэчлэлийн ажлыг үргэлжлүүлэхэд дээрх журмын нөхөд минь хамтран ажиллана гэдэгт бүрэн дүүрэн итгэлтэй байна.
Дархан сумын МАН-ын 10-р үүрийн гишүүн Б.Батболд
2020.01.15 Дархан-Уул аймгийн МАН-ын хорооны 3-р хурал.
Сэтгэгдэл (9)