Австрали улсад очсон Монгол улсы иргэн, 34 настай эрэгтэйгээс коронавирусийн халдвар илэрсэн гэж Эрүүл мэндийн яамны Төрийн захиргаа удирдлагын газрын дарга Б.Цогтбаатар мэдээллээ. 

Тэрээр БНХАУ-ын Гуанжу хотын нисэх онгоцны буудлаас Австралийн Мельбурн хотод энэ сарын 19-нд очсон. 

"Нислэгийн хугацаанд ямар нэгэн шинж тэмдэг илрээгүй ч Мельбурн хотод очсон оройдоо халуурч, эмнэлэгт тусгаарлагдаж, энэ сарын 25-нд коронавирус гэдэг нь лабораторийн шинжилгээгээр батлагджээ" гэж ЭМЯ-ны Төрийн захиргаа удирдлагын газрын дарга Б.Цогтбаатар хэлэв. 

Олон улсын эрүүл мэндийн дүрмийг Эрүүл мэндийн яам, ДЭМБ-ын гишүүн 196 орон дагаж мөрддөг. Үүний дагуу өвчлөлийн нөхцөл байдлын мэдээг дамжуулж байгаа бөгөөд дүрэм ёсоор өвчлөлийн бүртгэл нь Австрали улсад гарсан тохиолдлоор бүртгэгдэх юм байна.