ДАРХАН ХАЙРХАНЫХАА БЭЛД УХУУЛАХ УУ???
Өнгөрөгч долоо хоногийн пүрэв гарагт MyDarkhan сайтын редакцид Шарын гол сумын хэсэг иргэдээс “Дархан хайрханы бэлд алтныхан буучихлаа. Ухах нь шиг байна. Ирж сурвалжилаач” хэмээх хүсэлтийг тавьсан юм. Тус мэдээллийг авсан би бээр Шарын голын зүг, гэхдээ Хонгор сумын Хоёрдугаар багийн нутаг Буурт хэмээн газрыг зорилоо. Учир нь Дархан уулаас зүүн тийшээх энэхүү нутаг нь Хонгор суманд хамаардаг аж.
Бууртад, Дархан уулаа бараадан эцэг өвгөдийнхөө гал голомтыг залган, хэсэг айл хаяа хаяагаа бараадан айлсан амьдраад олон арваныг үджээ. Сүүлийн жилүүдэд тэдний эргэн тойронд уул уурхайн үйл ажиллагаа идэвхижиж, замынхан, уурхайнхан бас газар тариаланд “эзлэгдсээр” малын бэлчээр нь улам бүр хорогдсоор байна.
Өдөр бүр сүүн дээжээ Дархан хайрхандаа дээжлэн өргөх тэдний нам жим, эгэл амьдралд гуравдугаар сарын 19-ны үдэш Сэн толгойн энгэрт буусан гэр, байшин, машин тэрэг гэнэтийн түгшүүр болов.
ДАРХАН ХАЙРХАН, СЭН ТОЛГОЙН ЭНГЭРТ БУУСАН ТЭД ХЭН БЭ?
УИХ-ын Гишүүн асан Хөхөөгийн Балсандоржийн “Монрок” ХХК нь тус газарт уул уурхайн үйл ажиллагаа эрхлэх зөвшөөрөл бүхий Доод Золуу хар нэрээр MV-015091 дугаар бүхий Ашиглалтын лиценз эзэмшдэг байна. Тус лицензэд нийт 98.5 га газар хамаарах аж.
Ерөнхий захирал Х.Балсандорж нь 2019 оны есдүгээр сарын 13-ны өдөр Гүйцэтгэх захирлаараа Т.Алтанцэцэгийг томилсон байх ба Дархан хайрханы ойролцоох тус газар нутагт явуулах уул уурхайн ашиглалтын үйл ажиллагааг Алтанцэцэг гэх эмэгтэйг хариуцана хэмээн Балсандорж захирал нутгийн иргэдэд танилцуулсан аж.
“МОНРОК” КОМПАНИЙ ЗАХИРАЛ Х.БАЛСАНДОРЖ ГЭЖ ХЭН БЭ?
Тэрбээр 2000-2004 онуудад УИХ-ын Гишүүн байсан агаад МАН-д нөлөө бүхий эрхмүүдийн нэг. Багануур ХХК-ы анхны Гүйцэтгэх захирал, Шивээ Овоо ХК-ы Ерөнхий захирлаар ажиллаж байсан аж. Түүний улс төрийн болоод уул уурхайн үйл ажиллагаануудыг сөхвөл сонирхолтой түүх намтар арвинтай нэгэн бололтой. Нутгийн иргэдийн хэлж байгаагаар тэрбээр Шарын гол сумын хэд хэдэн газарт ухаж, сэндийчиж “үзсэн” бөгөөд төдийлөн амжилт олоогүй тул нөхөн сэргээлт хийлгүй орхиж явсан нь олон гэнэ. Түүнтэй хоршихоор зэхэж буй Т.Алтанцэцэг гэгч ч бас л уул уурхайд багагүй мөр үлдээсэн нэгэн юм байна.
Ямартай ч нутгийнхан "Дархан уулынхаа бэлд ямар ч “ТОМ” зөвшөөрөлтэй байлаа гэсэн ухуулахгүй шүү!" гэх үгийг дайлаа. “Хэрвээ газар хөндөх л юм бол нялх нойтон хүүхдүүдийнхээ хамт экскиных нь шанаган доор хэвтэнэ” хэмээн хатуухан хэлж байна.
Хонгор сумын Хоёрдугаар багийн иргэн Д.Цэрэндорж
Хонгор сумын Хоёрдугаар багийн иргэн Ж.Даваахүү
Шарын голын Баялагийн төлөө ТББ-ын Тэргүүн Т.Ганболд
Энэ тухайгаа тэд сумынхаа Засаг Даргад бичгээр мэдэгдээд байгаа бөгөөд Хонгор сумын Засаг Дарга Т.Атархишигээс энэ талаар тодруулахад “МонРок компани нь тус газарт Ашиглалтын лиценз эзэмшдэг бөгөөд үйл ажиллагаа эхлүүлэх зарим бичиг баримт нь бүрдээгүй байгаа. Бид ирж уулзахыг сануулсан. Байгаль орчны нарийвчилсан үнэлгээ хийгдэж, багийн Иргэдийн нийтийн хурлаар хэлэлцсэний эцэст уул уурхайн үйл ажиллагаа явуулах эсэхийг шийдвэрлэгдэнэ" хэмээх тайлбарыг өглөө.
Бид энэ талаар үргэлжлүүлэн сурвалжилна.
Жич:
Тус нийтлэлийн дараа иргэдийн эсэргүүцэл, цагдаагийн байгууллагын шаардлагаар МонРок ХХК нь Дархан хайрхан Сэн толгойн энгэрт буусан кемпээ буулгасан байна. Гэхдээ тэд дөрөвдүгээр сард хуралдах Эрдэс баялагийн зөвлөлийн хурлын шийдвэрийг хүлээж байгаа гэдгээ хэлж байсан.
Сэтгэгдэл (19)