Сонгууль ирэх зургаадугаар сарын 24-ны өдөр товлогдсон. Дэлхий нийтийг хамарсан коронавирусийн цар тахлаас шалтгаалан сонгуулийг хойшлуулах эсэх талаар ярьж байгаа ч намууд мөрийн хөтөлбөрөө танилцуулж, батлуулах ажил явагдаж, нэр дэвшигчдээ тодруулж байна.

Бидэнд ирсэн мэдээллээр дараах эрхмүүд энэ удаагийн УИХ-ын сонгуульд Дархан-Уул аймгаас нэр дэвшихээр горилж байна. Тухайлбал:

МАН-аас: 

2016 онд УИХ-д сонгогдон Гишүүн болсон Д.Хаянхярваа, Б.Жавхлан, Б.Баттөмөр нар дахин нэр дэвшихээр горилж байгаа бол тэдэнтэй зэрэгцэн Монголын төмөр зам, Гаалиар “овоглосон” Б.Цэнгэл, сүүлийн үед эрчимтэй ПиАр-аа хийж, уул уурхайн бодлого судлаач хэмээн өөрийгөө танилцуулах болсон Г.Дамдинням нарын нэрс хүчтэй яригдаж байна.

Ардчилсан намаас: УИХ-ын дарга асан З.Энхболд, “Бурхан Халдун” группын Ерөнхийлөгч Н.Мөнхдаш, ДДЦС-ын дарга асан О.Нямдаваа нарын нэр яригдахын зэрэгцээ “битүү морь” УИХ дахь АН-ын ажлын албаны зөвлөх А.Жаргал гэх эмэгтэйн нэр яригдаж байна.

Улс төрийн нөлөө бүхий хүчин болох МАХН-аас УИХ-ын Гишүүн асан, “ФенгШү” хэмээх С.Ганбаатар, Боловсролын дэд сайд асан Б.Тулга, Дархан-Уул аймгийн МАХН-ын Түмтийн дарга Д.Араажав нарын нэрс яригдаж байна. 

Улс төрийн 11 нам, 109 ТББ нэгдсэн ШИНЭ эвслээс Дархан-Уул аймгийн гурван мандатад 2015-2016 онд Дархан-Уул аймгийн ИТХ-ын даргаар ажиллаж байсан Б.Эрдэнэбат, одоогийн аймгийн ИТХ-ын бие даагч төлөөлөгч Д.Баасанжав, Н.Лхагвасүрэн нарын нэрс яригдаж байна.

Нэр дэвшигчид ирэх тавдугаар сарын 20 гэхэд хуулийн хугацаанд тодрох ёстой.  

Бид үргэлжлүүлэн горилогсдын талаарх танилцуулагыг хүргэх болно.