ПАРКЫН 8.4 ГА ГАЗРЫГ ХУВЬД ӨГӨХӨӨР ХЭЛЭЛЦЭЖ БАЙНА
Дархан-Уул аймгийн ИТХ-ын 7 дахь удаагийн сонгуулийн ээлжит 13 дугаар хуралдаан өглөө 9.00-д эхэлж 13.00–14.00 цагт завсарлаад дахин хуралдаж байна. Энэ удаагийн хурлаар дараах асуудлуудыг хэлэлцэн шийдвэрлэнэ. Үүнд: Аймгийн орон нутгийн төсвийн шилжих үлдэгдлээс зарцуулах хөрөнгийг батлах тухай, атар газрыг тариалангийн газарт шилжүүлэх тухай, орон нутгийн өөрийн өмчийн эд хөрөнгийг түрээслүүлэх журам, жишиг үнийг батлах тухай, Шарын гол сумын “Тулга сувилал” ОНӨААТҮГ-ыг менежментийн үр дүнг харгалзан хувьчлах тухай, “Миний Монгол” цэцэрлэгт хүрээлэнгийн орон нутгийн тусгай хамгаалалтанд авсан газрын талбайн хэмжээнд өөрчлөлт оруулах тухай зэрэг асуудлуудыг хэлэлцэж байна.
Бид “Миний Монгол” цэцэрлэгт хүрээлэнгийн газраас хувийн аж ахуйн нэгжид эзэмшүүлэх асуудалд, зарим төлөөлөгч ямар байр суурьтай байгааг сонирхлоо.
Бид олон жил паркаа ашиглалтанд оруулж, хүүхэд залуучууд чөлөөт цагаа өнгөрүүлэх орчныг бүрдүүлэх, тоглоомтой болгох асуудлыг ярьж байгаа. Одоогоор зургаан тоглоомыг орон нутгийн төсвийн хөрөнгө оруулалтаар аваад ирсэн. Дахин зургаан тоглоом хувийн хэвшлийн хөрөнгөөр нийлүүлнэ. Ингээд нийт 12 тоглоом бүхий жишиг соёл амралтын хүрээлэнг бий болгох зорилго байгаа юм. Хөрөнгөө оруулж буй аж ахуйн нэгжүүд маань газраа өөрсдийн нэр дээр авах хүсэлт тавьж, асуудлыг хурал хэлэлцэж байна. Миний эмзэглэж байгаа зүйл бол үе үеийн аймгийн удирдлагуудын хамгаалж ирсэн энэ газар, цаашид чиглэлээсээ хазайгаад явчих вий. Үүнд санаа зовж байна. Ажил хариуцаж буй хүмүүсийн өнөөдөр бидэнд өгч байгаа мэдээллээр, ийм асуудал байхгүй гэж байгаа. Миний энэ удаагийн хуралд хэлж байгаа санал бол гэрээ контрактаа эхнээс нь их зөв хийх. Хэдэн жилийн дараа ашиггүй байна гээд, өөр төрлийн үйл ажиллагаа явуулах вий гэхээс болгоомжлох хэрэгтэй. Тиймээс энэ байдлыг хаасан, зөв зүйл заалтыг гэрээндээ тусгаж өгөх нь чухал. Энэ саналыг хуралд хэллээ. Магадгүй өөр арга байдаг бол заавал эзэмшүүлж олгох шаардлага байна уу үгүй гэдгийг ч манай төлөөлөгч нар ч бас хөндөж байна.
- “Миний Монгол” цэцэрлэгт хүрээлэнгийн нийт 44,5 га газар орон нутгийн тусгай хамгаалалтанд байдаг. Тус цэцэрлэгт хүрээлэнд хүүхэд залуучуудын соёл амралтын цогцолбор байгуулах ажлыг төр өөр дээрээ авч, өөрсдийн хөрөнгө оруулалт, менежментээр ажиллуулахад хүндрэлтэй. Тэр бүр бололцоо байхгүй. Тиймээс хувийн хэвшлийн хамтын түншлэлээр цэцэрлэгт хүрээлэнгийн тохижилтыг шийдэж, соёл амралтын бүсээ хөгжүүлэн, хамтын менежментээр цаашид авч явах хэрэгтэй байгаа юм. Иймээс 8,4 га газрыг орон нутгийн тусгай хамгаалалтнаас гаргаж, хувийн хэвшилд шилжүүлэхээр болж байна. Гэхдээ төлөөлөгчийн хувьд би нэг зүйлд голлон анхаарал хандуулж асуулаа. Одоо мөрдөгдөж байгаа хуулийн дагуу хувийн хэвшилд 15 жилээр цэцэрлэгт хүрээлэнгийн газраас хувийн хэвшилд шилжих нь. Тэгвэл төрөөс хэрхэн хяналтаа тавих вэ. Үүнийг тодорхой болгох шаардлагатай. Дархан хот цаашдаа улам өргөжин тэлнэ. Эхнээс нь зөв төлөвлөж, зөв авч явахгүй бол Улаанбаатар хотын паркийн жишээгээр хувийн хэвшил нь авчихаад зориулалтын бус ашиглаад байвал яахав. Тиймээс асуудал гарахаас урьдчилан сэргийлж, олон талаас нь ярих нь зөв.
Сэтгэгдэл (36)